राजसाहेब ठाकरे ह्यांनी मांडलेली भूमिका :

• दहीहंडी सारख्या सणाचं बाजारीकरण झालंय, त्यात काही गैरप्रकार आहेत ते दूर झाले पाहिजेत, हे मान्य पण न्यायालयं उठसुठ हिंदू सणांवर का आक्षेप घेतंय ? म्हणे दहीहंडीत अपघात होतात, रक्त सांडतं. मग मोहरमच्या मिरवणुकीत पण लोकं स्वतःला रक्तबंबाळ करतात, तेंव्हा रक्त सांडत नाही का? त्याचं काय? मशिदीच्या भोंग्यांचं ध्वनिप्रदूषण होत नाही का? त्यांच्या सणांवर काही कारवाई करणार नाही कारण का तर दंगली होतील ही भीती.
• दहीहंडीत अपघात होतात म्हणून त्याच्यावर बंदी. ऑलिम्पिकमध्ये जिमनॅस्टना अपघात होतात, क्रिकेट खेळताना अपघात होतात मग ऑलिम्पिकमध्ये भाग घ्यायला किंवा क्रिकेट खेळायला पण बंदी घालणार का? राज्य सरकारने देखील कोर्टात योग्य बाजू मांडली नाही, जर ती मांडली असती तर ही वेळच आली नसती. मुळातच राज्य सरकारच्या हेतूंबद्दल शंका आहे. खरंच त्यांना हिंदूंच्या सणांबद्दल काही वाटतं का?
• दहीहंडी गोविंदा पथकांत लहान मुलांना सामावून घेतात जे चुकीचंच आहे, ते थांबलंच पाहिजे. माझा आक्षेप न्यायालयाने जी थरांवर मर्यादा घातली आहेत त्यावर आहे. दहीहंडी हा आमचा सण आहे, तो पारंपरिक पद्धतीनेच साजरा व्हायला हवा.

अशी भूमिका मांडत राजसाहेबांनी, “सुरक्षेच्या सर्व उपायोजना अंगीकारून दहीहंडी उत्साहात साजरी करा, भविष्यात जो काही संघर्ष होईल त्याची जबाबदारी मी घेतो.” असं गोविंदा पथकांना आश्वस्त केलं. राजसाहेबांच्या आदेशानुसार महाराष्ट्र नवनिर्माण सेनेने सर्वत्र पारंपरिक दहीहंडी उत्सवाचं आयोजन केलं. तुफान गर्दी, पारंपारीक वाद्य तथा खेळ यांच्यासोबतच गोविंदांच्या सुरक्षेचे सर्व निकष पुर्ण करत गोविंदांनी ठाणे जिल्हाध्यक्ष श्री. अविनाश जाधव ह्यांच्या दहीहंडी सोहळ्यात ९ थर रचले आणि दहीहंडी सणावरचं निर्बंधांचं, नैराश्याचं सावट दूर झालं.

त्यानंतर मनसे नेते श्री. अमित ठाकरे ह्यांनी राज्याचे मुख्यमंत्री देवेंद्र फडणवीस यांची वर्षा निवासस्थानी भेट घेतली. ह्यावेळी मुख्यमंत्र्यांशी चर्चा करताना अमित म्हणाले की. मुंबईतील अनेक मंडळ ही जुनी असून त्यातील अनेक मंडळांनी रौप्य, सुवर्ण, हिरक महोत्सवी वर्षात पदार्पण केले आहे. अशारीतीने पारंपरिक उत्सव साजरा करणाऱ्या मंडळांना मंडपाच्या परवानग्यांसदर्भात प्रशासन नाहक त्रास देत आहे. त्यावेळी तात्काळ विषय समजून घेऊन मुख्यमंत्र्यांनी महापालिका आयुक्तांना गणेशोत्सव मंडळांच्या अडचणी दूर करण्याच्या सूचना दिल्या आणि प्रश्न मार्गी लागला.